24 April 2017
Beste Ouers
KWARTAAL 2: OMSENDSKRYWE 1
Baie welkom terug by ‘n splinternuwe kwartaal vol uitdagings! Neem asseblief kennis van die volgende baie belangrike sake:
FIETSRYMARATHON – Dinsdag, 25 April – Woensdag, 26 April
- U het reeds verlede kwartaal die borgvorms ontvang vir more se groot dag.
- Leerders se borgvorms sal Woensdag, 26 April om 12:00 afgeteken word. Die kilometerlesing sal op die borgvorm aangebring word.
- Die borggeld moet asseblief op die heel laatste op Vrydag, 05 Mei 2016 by u kind se registeronderwyser inbetaal word. Die borgvorm moet asseblief saam met die geld ingehandig word.
- Indien leerders môre na 18:00 wil huis toe gaan, sal dit slegs toegelaat word indien u, as ouer, u kind kom uitteken. Géén leerder sal toegelaat word om na 18:00 die terrein te verlaat sonder ouertoesig nie. Leerders moet asseblief nie met allerhande ander versoeke kom nie.
- Leerders bly vir die duur van die fietsrymarathon in die saalarea. U kind sal dus deurentyd veilig wees. Daar is voortdurend genoeg personeel op diens om toesig te hou.
- Die Graad 11-leerders verkoop koeldrank, water en eetgoed. Leerders moet asseblief nie vleis bring om te braai nie, ook nie hul eie drinkgoed nie. Drink- en eetgoed word SLEGS by die skool gekoop.
- Die gewone Dag 7-rooster word Woensdag gevolg. Die skool sal wel om 12:00 uitkom wanneer die onderskeie grade (hopelik!) in die Kaap arriveer!
- Moet asseblief nie u kind onnodig by die huis hou nie. Indien u kind vir u vertel daar gaan niks by die skool aan nie, is dit nie noodwendig die waarheid nie!
REKENAARSTELSELSKADE
- Die skool se rekenaarstelsel het onherstelbare skade opgedoen a.g.v. ‘n kwaadwillige epos wat met ‘n aanhangsel deurgestuur is. Die ‘randsome ware’ het die data op die stelsel uitgevee. ‘Windows’ het baie seergekry, dus kan die lȇers wat die stelsel moet rugsteun, nie oopgemaak word nie.
- Ons doen alles in ons vermoȅ om te herwin wat ons kan. Op hierdie stadium kan ons egter glad nie enige data herwin nie. Rapporte kan byvoorbeeld nie tans oorgedruk word nie, of leerderinligting opgedateer word nie.
- Dit gaan ‘n hele paar dae neem om alle inligting weer gelaai en gestoor te kry. Die hele herwinningsproses is reeds aan die gang en onder weg. U moet asseblief geduld gebruik indien ons nie vining genoeg op versoeke reageer nie. Ons hou u op hoogte met die vordering.
KOERANTPROJEK
- Neem asseblief kennis dat die Laevelder die skool se vennoot is in die koerantprojek. Ouers kan dus nie alle ekstra koerante by hul kantore gaan oplaai sodat hul kind honderde en honderde bonuspunte kan kry nie!
- ‘n Leerder kan ‘n minimum van 20 punte en ‘n maksimum van 500 punte kry.
JUNIE-EKSAMEN
- Die Junie-eksamen is slegs ‘n maand weg!
- U kind kan onder géén omstandighede onnodig van die skool wegbly nie. Elke periode wat gemis word, laat ‘n gat in u kind se verstaan en kennis van die vakinhoud!
- Maak asseblief seker dat alle take wel op die gegewe datum ingehandig word. Dit is vir sommige leerders baie moeilik om hierdie datums te bestuur. Help asseblief waar moontlik.
Die wintersport ligawedstryde begin ook eersdaags. Kom ondersteun asseblief u kind wanneer hy / sy speel. Geen afrigter kan ‘n ouer se ondersteuning langs die veld vervang nie!
Vind asseblief aangeheg die verkorte kwartaalprogram.
Bergvlam-groete
Annemarié Kleynhans
Hoof