13 Januarie 2017
Beste Ouers
KWARTAAL 1: OMSENDSKRYWE 1
Baie welkom terug aan elke Bergvlam-gesin! Ons hoop dat dit vir elke gesin ‘n geseȅnde en vreugdevolle jaar sal wees. Die Hoȅrskool Bergvlam-familie sluit in onderwysers, leerders én ouers, voorwaar ‘n gedugte span vir 2017!
Neem asseblief kennis van die volgende belangrike sake:
- 1. NUWE PERSONEEL AANSTELLINGS EN NUWE LEERDERS
ü Dit is vir Hoȅrskool Bergvlam ‘n aangename voorreg om die volgende personeellede hartlik welkom te heet. Ons glo dat ons ‘n lang pad saam met hulle sal stap:
Me Esmarie van den Berg Wiskunde Gr 9
Mnr Quinten Taljard Wiskundige Geletterdheid Gr 11 &
Tegniese Wiskunde Gr 10
Me Nozipho Lusenga Mathematics, Natural Science &
Creative Arts Gr 8 & Gr 9
Mev. Lianie Cronje: Afrikaans Huistaal Gr 8 & Gr 10 en
Afrikaans Addisionele Taal Gr 9
Mnr. Joubert Jankowitz: Afrikaans Addisionele Taal Gr 11 & Engels Addisionele Taal Gr 8
Mev. Melaine Pienaar: Lewensoriȅntering Gr8, 10, 11 & 12
Mev. Debbie Larsen Finansiȅle beampte
– Baie welkom aan al ons nuwe Graad 8-leerders en hul ouers. Ons glo dat ons en u, as ouers, ‘n hegte band oor die volgende 5 jaar sal vorm. Raak asseblief betrokke by die skool se aktiwiteite en ondersteun u kind in alles waaraan hy / sy deelneem.
– ‘n Hartlike woord van welkom ook aan ons nuwe leerders in ander grade en hul ouers. Laat asseblief u kind by die verskillende aktiwiteite inskakel sodat hy / sy spoedig deel van die skool se hartklop kan word.
- 2. GRAAD 12 2016 UITSLAE
– Hoȅrskool Bergvlam is met reg trots op die puik uitslae van die 2016 matriekgroep. Met ‘n 99,5% slaagsyfer is ons steeds een van die top skole in die provinsie!
– Een van ons matriekleerders, Michelle Kasa, tel ook onder die toppresteerders in Mpumalanga. Sy ontvang daarvoor ‘n volle beurs van die Mpumalanga Regering.
– ‘n Totaal van 129 onderskeidings is behaal, en 51% slaag met universiteitstoelating.
- 3. WERKSETIEK EN ONDERSTEUNING
– ‘n Leerder met ‘n sterk sin vir self-dissipline en hoȅ vlakke van werksetiek, sal ongetwyfeld ‘n sukses van sy / haar toekoms maak. U kind het egter u hulp, leiding en ondersteuning in hierdie verband nodig.
– Die nie-inhandiging van take en opdragte is ononderhandelbaar! Alle take en opdragte móét ingehandig word op die geskeduleerde datum. Help u kind asseblief met effektiewe tydsbestuur.
– Moet asseblief ook nie u kind onnodig by die huis hou nie. U kind mis ‘n VOLLE dag se klaswerk, wat moeilik ingehaal word. Al stel u die skool telefonies in kennis dat u kind siek is, móét u steeds ‘n afwesigheidsbrief saam met u kind skool toe stuur wanneer u kind terugkom.
- 4. DATUMSKUIWE
Aangesien die Ehlanzeni Distrik se Graad 12-prysuitdelingsfunksie Dinsdag, 17 Januarie om 12:00 by die skool gehou word, raak dit die volgende:
- Die skool sal op Dinsdag, 17 Januarie reeds om 11:00 moet sluit om bogenoemde funksie te kan fasiliteer. Ouers sal dan uitsluitlik van die sporthek gebruik kan maak om leerders op te laai. Indien u nie u kind op daardie tydstip kan kom oplaai nie, kan hy / sy by die skool bly totdat dit vir u geleȅ is om hom / haar te kom oplaai. Ons sal ‘n wagplek vir hulle beskikbaar stel, ook in hierdie geval mag u net van die sporthek gebruik maak.
- As gevolg van die omvang van hierdie funksie, skuif ons die Interhuis Atletiekdag na Vrydag, 20 Januarie vanaf 07:40 tot 13:00. U kind is óf ‘n atleet, óf ‘n toeskouer, óf ‘n helper. Moet asseblief nie toelaat dat u kind u ompraat om tuis te bly en ‘n heerlike dag mis te loop nie!
- Die oueraand vir die Graad 10 tot Graad 12 ouers, vind nou op Woensdag, 18 Januarie om 18:00 in die skoolsaal plaas. Doen asseblief moeite om dit by te woon.
- 5. MEISIES SENIORDRAG EN ATLETIEKDRAG
- Die nuwe seniordrag vir Graad 11 en 12 meisies word ingefaseer. Indien u kind reeds seniordrag het, dra sy dit totdat dit nie meer pas nie.
- Die nuwe hempie is reeds by Rieba beskikbaar. Die nuwe rompe sal beskikbaar wees sodra ons verskaffers dit van die fabriek ontvang. Intussen word die ou romp steeds gedra.
- Meisies kan dus nog vir hierdie jaar die nuwe hemp met die ou romp kombineer.
- Onthou asseblief dat ‘n goedkoper weergawe van die hofskoen by Shoe City beskikbaar is. Moet asseblief nie ‘n ongemaklik modeskoen vir u kind koop nie, dit is NIE die voorgeskrewe skoen NIE.
- Die nuwe atletiekdrag is beskikbaar, en kan vanaf Maandag, 16 Januarie, by Rieba of Dino Sport gekoop word. Atlete moet asseblief so gou moontlik vir hulle die nuwe atletiekdrag aanskaf.
- 6. BERGFIETSKLUB
- Aangesien daar soveel leerders is wat reeds aan bergfietswedrenne deelneem, en lief is vir die sport, gaan ons ‘n bergfietsklub by die skool begin.
- Die Hoȅrskool Bergvlam-bergfietsklere is reeds goedgekeur, en sal eersdaags beskikbaar wees.
- Daar is heelwat bergfietswedrenne waaraan ons leerders sal kan deelneem.
- 7. VERLENGDE SKOOLURE – GRAAD 10, 11, 12
- Die verlengde skoolure vir Graad 10, 11 en 12 is verpligtend. Dit is geensins ekstra klasse nie. Die kurrikulum is doodeenvoudig te vol, dus kan die sillabus nie voltooi word sonder dat ekstra tyd toegevoeg word nie. Bywoning is dus ononderhandelbaar.
- Graad 12 Wiskunde Maandag – Afrikaans
- Dinsdag – Engels
- Graad 12 Fisiese Wetenskap Maandag – Engels Dinsdag – Afrikaans
- Graad 10 – 12 Rekeningkunde Soos gereȅl deur Mev. Bierman
- Visuele Kuns en Ontwerp Soos gereȅl met Mev. Alma Swart
- Gr 12 Geografie Maandae 14:00 – 16:00
- 8. SORTPERIODES
- Let asseblief daarop dat ons sportperiodes na die einde van die dag toe skuif.
- Atlete kan dus na skool aangaan met hul oefening.
- Die geesspan se oefening sal dan duur tot 14:00.
- 9. SKOOLFONDS EN VERBRUIKERSFOOIE
– Báie dankie aan elke ouer wat reeds die jaar / kwartaal se skoolfonds vereffen het. Veral so aan die begin van die jaar help dit baie.
– U kan soos volg betaal:
- Eenmalig voor 1 Maart 2017 (R1 500 korting) R16 500
- Maandeliks: kontant / tjek / internet –
Januarie tot Oktober 2017 R1 800
- Maandeliks: kontant / tjek / internet
Januarie tot Desember 2017 R1 500
– Indien u in ‘n finansiȅle knyptangsituasie verkeer tref asseblief onverwyld reȅlings met die finansiȅle kantoor en voltooi dadelik ‘n kortingaansoekvorm. Hoe gouer u hierdie reȅling tref, hoe gouer het u gemoedsrus.
– Verbruikersfooie en werkboekgelde moet asseblief teen die einde van Januarie vereffen word. Indien u dit nie kan bybring nie, moet ‘n skriftelike reȅling met die vakonderwyser getref word.
– By vakke met ‘n praktiese komponent sal leerders nie met die prakties kan begin indien die verbruikersfooie nie betaal is nie.
- 10. UITTEKENVERSOEKE
- Indien dit onvermydelik is om u kind gedurende die akademiese dag te kom uitteken, moet u ‘n skriftelike versoek saam met u kind skool toe stuur.
- Hierdie versoek word soggens voor skool / in voogperiode deur u kind by Ontvangs ingehandig. U kind sal dan ‘n toestemmingsbriefie ontvang om die klas op die spesifieke tyd te verlaat. U kry u kind dan by Ontvangs sonder dat die klas onnodig gesteur word.
- Sou u nie ‘n brief saamstuur nie, en net opdaag om u kind te kom haal, sal u ongelukkig tot aan die einde van daardie periode moet wag voordat u kind uitgeroep word.
- NIEMAND mag u kind sonder u toestemming uitteken nie. Indien dit vir u onmoontlik is om u kind te kom haal, móét u self met Ontvangs reȅl presies wie die persoon is wat u kind kom haal.
- 11. TWEEDEHANDSE KLEREWINKEL
- Ons is steeds dringend op soek na ‘n ouer wat vir ons die tweedehandse klerewinkel kan bedryf.
- U hoef nie die hele dag by die skool deur te bring nie, slegs die tye wat die klerewinkel oopmaak, dit is onderhandelbaar. Dit is egter belangrik dat die klerewinkel ELKE DAG oopmaak.
- Indien u kans sien vir hierdie liefdesdiens, kontak asseblief vir Mev. Kleynhans onverwyld.
- 12. GRAAD 8-SPANBOU
– Die Graad 8-spanbou is gewoonlik ‘n heerlike dag vol pret.
– Al reȅn dit, gaan ons steeds voort!
– Onthou om ou klere aan te trek, en genoeg sonblok in te pak.
- 13. RUITPLAKKERS
– Die 2017 ruitplakkers is by die hoofingang by sekuriteit en by die finansiȅle kantoor beskikbaar teen R20,00 elk.
– U spaar uself baie moeite deur ‘n plakker te koop. Indien u dit nie doen nie, sal u ongelukkig elke keer by die hek moet inteken.
- 14. WEB, D6 COMMUNICATOR, SELFOONTOEPASSING
– Al die inligting wat u verlang is op die skool se webblad beskikbaar.
– Registreer op D6 Communicator sodat u daagliks ingelig kan word oor noodsaaklike inligting.
– Maak gebruik van die skool se toepassing (app) op ‘playstore’ om op hoogte te bly met gebeure by die skool.
– Volg ons asseblief ook op Face Book en Twitter
- 15. INNIBOS-STEM
– Hoȅrskool Bergvlam en Innibos is sinoniem met mekaar. Innibos is weereens genomineer as een van die beste kunstefeeste.
– Kom ons ondersteun hulle deur vir hulle te stem op http://kyknetfiestas.co.za/
Hartlike Bergvlam-groete
Annemarié Kleynhans
Hoof