Beste Ouers
KWARTAAL 2: OMSENDBRIEF 2
In ‘n oogknip trek ons alreeds weer in die helfte van hierdie kwartaal! Elke week is volgepak met akademie, sportoefening en –wedstryde en kultuuroefening vir What a wonderful world. Intussen peil die eksamen ook op ons af! Dit is dus nodig dat ons ‘n paar dringende sake onder u aandag bring:
- BEVORDERINGS
Dit is vir die skool aangenaam om bekend te maak dat die volgende Departementshoof-aanstellings gemaak is:
- Mnr. Rian Cooper: Mnr. Cooper was ‘n waarnemende Departementshoof, maar is nou as volwaardige Departementshoof aangestel vir al die Besigheidsvakke.
- Mnr. Deon Immelman: Mnr. Immelman is aangestel as Departementshoof vir al die Tegniese vakke.
- Mnr. Cornel Dreyer: Mnr. Dreyer is aangestel as Departementshoof vir al die Wetenskapvakke. Mnr. Dreyer is tans nog ‘n onderwyser by Hoȅrskool Nelspruit, en begin in sy amptelike hoedanigheid by ons op 01 Julie.
- KLEREBANK
Mev.Jenny Bhana, een van ons ouers, het die verantwoordelikheid van die klerebank oorgeneem. Mev. Bhana is bedags by die klerestoor, agter die saal beskikbaar en lewer ‘n uitmuntende diens aan ons ouers en leerders. Die skool wil hiermee ook sy dankbaarheid teenoor Mev. Bhana uitspreek vir haar bereidwilligheid om hierdie onbaatsugtige diens te lewer.
- KULTUURWEEK
Ons Kultuurweek vind die laaste week in Mei plaas:
- Ons leerders is op hierdie stadium besig om onverpoosd te oefen vir die optredes van What a wonderful world. Al die betrokke ouers sou teen hierdie tyd reeds die finale oefenreȅlings ontvang het.
- Kaartjies is reeds by die finansiȅle kantoor beskikbaar teen R30,00 vir kinders en R50,00 vir volwassenes. Die optredes vind op Woensdag 28 Mei, Donderdag 29 Mei en Vrydag 30 Mei om 19:00 in die skoolsaal plaas.
- Soos in die verlede, word daar op Dinsdag, 27 Mei ‘n spesiale gratis opvoering vir alle senior burgers om 14:00 aangebied. Ouetehuise word uitgenooi, ons leerders se oupas en oumas is ook baie welkom. Leerders moet asseblief vir Mnr. Org van den Berg verwittig indien hul oupas en oumas die opvoering wil bywoon.
- Die Graad 7-leerders van ons voedingskole word Woensdag, 28 Mei op ‘n verkorte weergawe van die opvoering getrakteer tydens hul Opedag besoek.
- Op Maandag, 26 Mei het ons ‘n kultuurdag by die skool. Die leerders is reeds ingelig oor die reȅlings. Neem asseblief kennis van die volgende:
Leerders mag met ‘n netjiese denim skool toe kom. Die onderskeie grade dra die volgende kleur T-hemp daarmee saam sodat ons die landsvlag kan uitbeeld wanneer die leerders in die saal gepak word:
- Graad 8 rooi Graad 9 blou
- Graad 10 groen Graad 11 geel
- Graad 12 swart Bestuurkomitee wit
Leerders kan kos- en produkte stalletjies teen R50,00 huur vir ‘n verlengde pouse. ‘n Spesifieke kultuur se kos en produkte moet verkoop word. Al die nodige reȅlings word met leerders getref wat hierin belangstel. Let asseblief daarop dat daar nie tyd is om kos te verkoop wat ‘n lang gaarmaakproses behels nie. Alles was verkoop word, moet vining en maklik wees.
Na die kultuuraktiwiteite afgehandel is, is dit ‘n NORMALE SKOOLDAG! Moet asseblief nie u kind by die huis hou nie, die eksamen is voor die deur! Belangrike werk word in die klas gedoen wat GEEN kind op hierdie stadium kan mis nie!
- OPEDAG
Die Graad 7-opedag vind op Woensdag, 28 Mei plaas. Graad 7-leerders sal reeds vanaf 13:00 arriveer. Om alles in gereedheid te kry, sal die skool reeds om 12:30 sluit. Ons het baie leerderhulp nodig, dus sal die meerderheid leerders die hele middag betrokke wees by al die aktiwiteite.
Die opedag eindig teen 17:00, waarna ons moet opruim. Alle helpers sal tot ten minste 17:30 betrokke wees.
5. JUNIE-EKSAMEN
- Aangeheg vind u die Junie-eksamenrooster.
- Die afbakenings sal vanaf Dinsdag, 20 Mei op die Communicator beskikbaar wees.
- Let asseblief daarop dat GEEN spesiale reȅlings getref kan word om ‘n vraestel voor of na die eksamendatum te skryf nie!
- U kind kan nie wag tot die dag voor ‘n vraestel geskryf word om te begin leer nie. Werk asseblief nou al saam met u kind ‘n studierooster uit indien u dit nog nie gedoen het nie. Maak seker dat u kind wel leer!
- Onthou: ‘n leerder móét ten minste 50% vir huistaal en 40% vir addisionele taal hê om enigsins te kan slaag. Gaan kyk weer na die slaagvereistes op u kind se eerste kwartaal rapport.
- Dit is vir my skokkend dat daar ouers is wat steeds nie hul kind se eerste kwartaal rapport kom afhaal het nie! Doen dit asseblief onverwyld, of stuur ‘n toestemmingsbrief saam met u kind.
- Indien u nog nie van die Communicator gebruik maak nie, volg dan die volgende instruksies:
http://www.school-communicator.com/download.php
- UITREIK-AKSIES
Die skool is tans by ‘n hele aantal uitreik-aksies betrokke. Ons vra asseblief u ondersteuning vir die volgende aksies:
- Mnr en Mej Bergvlam-uitreik. Leerders mag môre, Vrydag, 16 Mei enige serp van hul keuse skool toe dra, mits hulle blikkies kos, warm klere, komberse of ‘n kontantbedrag saambring skool toe.
- Een van ons kankerdebutante, Zoey de Lange, het ook ‘n spray-a-thon gereȅl vir môre. Leerders betaal R10,00 om hul hare te laat kleursprei. Hierdie kleure moet asseblief weer teen Maandag, 19 Mei uitgewas wees. Heelwat van die gesinne in ons skool word, of is reeds, deur kanker geraak. Dra asseblief mildelik by vir hierdie projek.
- Op Vrydag, 30 Mei mag leerders hul tekkies skool toe dra, mits hulle R10,00 betaal vir Tekkie Tax. Sou hulle die groen en oranje veters wil by koop, sal dit hulle saam met die plakker R30,00 kos. Hierdie fondse word alles oorbetaal aan wat aan minderbevoorregte kinders in die Laeveld kos en klere voorsien. Ondersteun asseblief ook hierdie projek.
- EKSTRA KLASSE
Die skool kry op ‘n gereȅlde basis navrae oor ekstra klasse in spesifieke vakke. Die volgende persone het hul besonderhede verstrek, kontak hulle gerus sou u van hul dienste wil gebruik maak:
- Hulp met Afrikaans en Engels: Marleen van Wyk – 078 193 2005; e-pos: lowveldlanguage@gmail.com; webwerf: lowveldlanguage.co.za
- Hulp met Wiskunde: Marina Otto – 082 823 8414.
- VORIBOS EN INNIBOS
- Die Voribos-konsert vind volgende Vrydag, 23 Mei op ons terrein plaas. Toegang is gratis. Die Graad 11’s en die kultuurouers gaan by die kosverkope betrokke wees om fondse te in. Indien u die konsert bywoon, ondersteun hulle asseblief.
- Innibos is reeds besig om alles in gereedheid te bring vir hierdie jaar se kunstefees. U sal opmerk dat heelwat werk tans op die terrein plaasvind.
- GELUKWENSE
Baie geluk aan die volgende leerders wat hul plek in Mpumalanga-spanne los gespeel het, asook spanne wat na die volgende rondtes deurdring:
HOKKIE
- ADELAIDE SIDELL O/16
- TIFFINEY PAYNE O/18
- RICHARD WESSELS O/14
- JEANDRÉ WESSELS O/18
NETBAL
NJABULISO NGOMANE O/17
NELLY MKHONTO O/16
MICHELLE MATHEBULA O/14
RUGBY
TRISTAN LOUW is gekies om te gaan deelneem aan die Cravenweek gedurende die Julie vakansie. Ons is baie trots op jou.
ü ATLETIEK – MAUDAS BANDA: Die skool se beste wense vergesel Maudas. Maudas neem vanaf volgende week af deel aan die Afrika-spele in Botswana as lid van die SA Junior Atletiekspan. Maudas is ‘n uitblinker in verspring seuns O/16, ons hou vir hom styf duimvas.
Heelwat ouers kontak my per e-pos, u is enige tyd welkom om my te kontak sou daar iets wees wat u wil bespreek.
Vlammie groete
…………………………………
ANNEMARIé KLEYNHANS
HOOF
